55 நாட்களில் 5000 கி.மீ சைக்கிள் பயணம் மேற்கொண்ட இளைஞர்
நன்றாக நண்பர்களுடன் அரட்டையடித்து, செய்யும் வேலையை நேசித்து வாழ்க்கையை அனுபவிக்க வேண்டிய வயதில் டெல்லியை சேர்ந்த 24 வயது இளைஞர் ஒருவர் சைக்கிள் பயணம் மேற்கொண்டு உள்ளார். அதுவும் ராஞ்சியில் இருந்து சிங்கப்பூர் செல்வதற்கு. கிட்டத்தட்ட 55 நாட்களில் 6000 கி.மீ வரை அவர் பயணித்து உள்ளார் என்றால் நம்ப முடிகிறதா?
ஹிமான்ஷு கோயல் என்ற இளைஞர் தான் படித்து கொண்டிருந்த சி.ஏ. படிப்பில் தேர்ச்சி பெற முடியாத தருணம் அவருக்குள் சைக்கிள் பயணம் ஐடியாவை உண்டாக்கியது. அதனை தொடர்ந்து கடந்த ஆகஸ்ட் 20 ஆம் தேதி தனது சைக்கிள் பயணத்தை மேற்கொண்டார்.அத்தியாவசியமான பொருட்களை மட்டுமே எடுத்துக்கொண்டு தொடங்கிய இந்த பயணம் முதல் 150 கி.மீ வரை எந்த எதிர்பார்ப்பும் இல்லாமல் , எந்த ஸ்பான்சரும் இல்லாமல், பயணம் செய்யும் உள்ளூர் மக்களை மட்டுமே நம்ப வேண்டியிருந்தது.
கடந்த ஆண்டு வெறும் 10 கி.மீ.க்கு மேல் சைக்கிள் ஓட்டாத ஹிமாஷு இந்த ஆண்டு தொடக்கத்தில் மணாலியில் இருந்து லடாக் வரை சைக்கிள் பயணம் மேற்கொண்டார். இலக்கை அடைய அவருக்கு ஆறு நாட்கள் பிடித்தன. இதனை அவர் தனது சிங்கப்பூர் பயணத்திற்கு முன்மாதிரியாக எடுத்துக்கொண்டார். தனது 55 நாட்கள் பயணத்தில், திரிபுரா, அசாம், மணிப்பூர், பங்களாதேஷ், மியான்மர், தாய்லாந்து, மலேசியா மற்றும் இறுதியாக சிங்கப்பூர் உள்ளிட்ட பல இடங்களுக்குச் சென்றார்.
ஹிமான்ஷூவுக்கு ஒரு சுற்றுலா விசா இருந்தது. அதனை மற்ற நாடுகளுக்கு கடப்பதற்கு அவர் பயன்படுத்தினார். அதிலும் அவர் தாய்லாந்தை அடைந்தபோது அவருக்கு 15 நாட்களுக்கு மட்டுமே விசா கிடைத்தது. 15 நாட்களில் அவர் கிட்டத்தட்ட 1500 கி.மீ தூரமுள்ள முழு நாட்டையும் கடக்க வேண்டியிருந்தது. ஆனால் குறிப்பிட்ட காலத்திற்குள் அதனை கடந்து சாதித்தார்.
ஹிமான்ஷுவின் பயணத்தின்போது அவர் ஏராளமான துன்பங்களை அனுபவித்ததாக தெரிவித்துள்ளார். மலேசியாவில் ஒரு கோவிலில் இருந்த போதுஉள்ளூர் பையன் ஒருவன் பைக்கில் கத்தியும் கல்லும் கொண்டு அவனைத் தாக்கினான். மேலும் ஹிமாஷுவின் சைக்கிள் டயர்களை பஞ்சர் செய்து பணத்திற்காக மிரட்டி கடைசியில் வாட்சை எடுத்துக்கொண்டு ஓடியதாக குறிப்பிட்டுள்ளார். அதேபோல் அசாமைக் கடக்கும்போது அவர் மீது கார் மோதியது. இதில் அவருக்கு உடலில் காயம் ஏற்பட்டது.
இந்த வெற்றிகரமான மற்றும் எழுச்சியூட்டும் பயணத்திற்குப் பிறகு, ஹிமான்ஷு இப்போது இந்தியாவில் இருந்து ஐரோப்பாவிற்கு சைக்கிள் பயணம் செல்ல திட்டமிட்டுள்ளதாக தகவல் வெளியாகியுள்ளது.