இன்ஸ்டாகிராமில் புதிதாக கணக்கு தொடங்குபவர்கள் இனி செல்ஃபி வீடியோ கட்டாயம் பதிவு செய்ய வேண்டும் என்ற அறிவிப்பு விரைவில் வெளியாக உள்ளது.
சமூக வலைத்தளங்களில் ஒன்றான இன்ஸ்டாகிராம் பக்கத்தில் மில்லியன் கணக்கான பயனாளர்கள் உள்ளனர். குறிப்பாக திரையுலக, அரசியல் பிரபலங்கள் அதில் கணக்கு வைத்துள்ளனர்.
இந்த நிலையில் இனிமேல் இன்ஸ்டாகிராமில் கணக்கு தொடங்குபவர்கள் செல்பி வீடியோவை அப்லோட் செய்ய வேண்டும் என்று கூறப்பட்டுள்ளது. இது பயனர்கள் இடையே சலசலப்பை ஏற்படுத்தியுள்ளது.
தலையை வெவ்வேறு திசைகளில் திரும்பியபடி ஒரு சிறிய வீடியோவை இன்ஸ்டாகிராம் கேட்கும். இந்த வீடியோ செல்ஃபிகள் பின்தளத்தில் சேமிக்கப்படாது மற்றும் 30 நாட்களில் நீக்கப்படும். பதிவேற்றும் வீடியோ செல்ஃபிகள் ஒருபோதும் பிளாட்ஃபார்மில் காட்டப்படாது.
பயோமெட்ரிக் தரவைச் சேகரிக்க மாட்டோம் அல்லது நிறுவனத்தின் முகத்தை அடையாளம் காணும் தொழில்நுட்பத்தைப் பயன்படுத்த மாட்டோம் என்று நிறுவனம் உறுதியளித்துள்ளது.
இன்ஸ்டாகிராமில் போலி கணக்குகள் மற்றும் ஸ்பேம் கணக்குகளின் எண்ணிக்கையைக் குறைக்கும் முயற்சியாக இந்த நடவடிக்கை இருக்கும் என தெரிவிக்கப்பட்டுள்ளது. அதோடு புதிய நபரின் அடையாள சரிபார்ப்புக்கு இந்த புதிய முறை உதவும் என்றும் தெரிவிக்கப்பட்டுள்ளது.