முதலமைச்சர் தலைமையில் இன்று கூடுகிறது அமைச்சரவை கூட்டம்

2020-21 ஆம் ஆண்டிற்கான தமிழக பட்ஜெட் குறித்து விவாதிக்க தமிழக அமைச்சரவை கூட்டம் இன்று நடைபெறுகிறது.

தலைமைச்செயலகத்தில் இன்று காலை 10.30 மணிக்கு தொடங்கும் இக்கூட்டத்திற்கு முதலமைச்சர் எடப்பாடி பழனிசாமி தலைமை தாங்குகிறார். கூட்டத்தில் துணை முதலமைச்சர் ஓ பன்னீர்செல்வம், தமிழக அமைச்சர்கள், தலைமைச் செயலாளர் ஆகியோர் பங்கேற்கின்றனர்.

இதில் 2020-21 ஆம் ஆண்டிற்கான தமிழக பட்ஜெட் குறித்து விவாதிக்கப்பட உள்ளதாக தகவல்கள் வெளியாகியுள்ளன.

மேலும் கொரோனா வைரஸை கட்டுப்படுத்துவது குறித்தும், தொழிற்சாலைகளுக்கான விரிவாக்கத் திட்டங்கள் குறித்தும் இந்த அமைச்சரவை கூட்டத்தில் விவாதிக்கப்பட உள்ளதாக கூறப்படுகிறது.

ஏற்கனவே இந்த ஆண்டு முதல் அமைச்சரவைக் கூட்டம் கடந்த மாதம் 20ஆம் தேதி நடைபெற்றது குறிப்பிடத்தக்கது.