சென்னை:-
மத்திய இணையமைச்சராக பொறுப்பேற்றுள்ள தமிழக பாஜக தலைவர் எல்.முருகனுக்கு, தமிழக முதல்வர் மு.க.ஸ்டாலின், எதிர்க்கட்சி தலைவர் எடப்பாடி பழனிசாமி ஆகியோர் வாழ்த்துக்கள் தெரிவித்துள்ளனர்.
நேற்று பிரதமர் நரேந்திர மோடி தலைமையிலான மத்திய அமைச்சரவை விரிவாக்கம் செய்யப்பட்டது. இதில் 43 பேர் அமைச்சர்களாக பதவியேற்றுக் கொண்டனர்.
இவர்களில் 15 பேர் கேபினட் அமைச்சர்கள், 28 பேர் இணை அமைச்சர்கள். புதிய அமைச்சர்களுக்கான இலாகாக்கள் ஒதுக்கப்பட்டுள்ளன.
இதில், தமிழகத்தில் இருந்து மத்திய இணை அமைச்சராக தேர்வாகியுள்ள எல். முருகனுக்கு மீன்வளத்துறை, தகவல் மற்றும் ஒளிபரப்புத் துறை கால்நடை மற்றும் பால்வளத் துறை இலாகா ஒதுக்கப்பட்டிருக்கிறது.
இந்த நிலையில், மத்திய இணையமைச்சரான எல். முருகனுக்கு தமிழக முதல்வர் மு.க.ஸ்டாலின் தொலைபேசியில் வாழ்த்து தெரிவித்துள்ளார்.
அதேபோல் எதிர்க்கட்சி தலைவர் எடப்பாடி பழனிசாமியும் எல். முருகனுக்கு வாழ்த்து தெரிவித்துள்ளார்.