தமிழகத்தில் புதிதாக ரேஷன் கார்டு விண்ணப்பிக்கும் போது ரத்து செய்யப்படுவதை தடுக்கும் வகையில் முக்கிய வசதி ஒன்று அறிமுகம் செய்யப்பட்டுள்ளது.
தமிழகத்தில் உள்ள 39 மாவட்டங்களில் 34,773 ரேஷன் கடைகள் செயல்பட்டு வருகின்றன. இதன் மூலம் 2.19 கோடி குடும்பங்கள் பயனடைகின்றன.
இதையொட்டி 6.86 கோடி ஆதார் பதிவுகள் பெறப்பட்டுள்ளன. 2.18 கோடி பேரின் கைபேசி எண்களும் பதிவு செய்யப்பட்டுள்ளன. புதிதாக ரேஷன் கார்டுகள் விண்ணப்பிக்க வசதியாக tnpds.gov.in என்ற இணையதளம் பயன்பாட்டில் இருக்கிறது.
இதில் புதிய ரேஷன் கார்டு விண்ணப்பித்தின் நிலை, நகல் மின்னணு ரேஷன் கார்டு விண்ணப்பிக்க, ரேஷன் கார்டில் உறுப்பினரை சேர்க்க, முகவரி மாற்றம் செய்ய, குடும்பத் தலைவர் மாற்றம் செய்ய, குடும்ப உறுப்பினர் நீக்க, அட்டை தொடர்பான சேவை நிலை அறிய என பல்வேறு வசதிகள் செய்யப்பட்டுள்ளன.
புதிதாக ரேஷன் கார்டு விண்ணப்பிக்கும் போது ஆதார் எண்ணுடன் முகவரி சான்று உள்ளிட்ட ஆவணங்களின் நகலை பதிவேற்றம் செய்ய வேண்டும்.
இவற்றை இணையதளம் வாயிலாகவே அதிகாரிகள் சரிபார்த்து, வீடுகளுக்கு கள ஆய்வு ஊழியர்களை அனுப்பி கார்டு வழங்க பரிந்துரை செய்வர். பலரிடம் போதிய ஆவணங்கள் இல்லை எனக் கூறி விண்ணப்பங்கள் நிராகரிக்கப்படும் சூழல் நிலவுகிறது.
இதனால் விண்ணப்பதாரர்கள் பெரிதும் பாதிக்கப்படுகின்றனர். இதுகுறித்து உணவுத்துறை அதிகாரிகள் கூறுகையில், இனிமேல் போதிய ஆவணங்கள் இல்லை என்று கூறி விண்ணப்பத்தை ரத்து செய்ய முடியாது.
அதற்காக ’மறுபரிசீலனை விண்ணப்பம்’ என்ற புதிய வசதி சேர்க்கப்பட்டுள்ளது. எனவே தேவைப்படும் ஆவணங்கள் குறித்த விவரம் எஸ்.எம்.எஸ் மூலம் விண்ணப்பதாரர்களுக்கு தெரிவிக்கப்படும்.
பின்னர் மொபைல் எண்ணிற்கு அனுப்பப்பட்ட குறியீட்டு எண்ணை பயன்படுத்தி, மறு பரிசீலனை விண்ணப்ப பக்கத்தில் குறிப்பிட வேண்டும். அந்த பக்கம் திறந்ததும் மொபைல் எண்ணை பதிவு செய்து ஓடிபி எண்ணை பதிவிட வேண்டும்.
இதற்கடுத்து வரும் பக்கத்தில் தேவைப்படும் விவரங்கள் காட்டும். அதன் அடிப்படையில் ஆவணங்களை பதிவேற்றலாம். உரிய திருத்தங்கள் செய்து பதிவேற்றலாம். இதையடுத்து சம்பந்தப்பட்ட அதிகாரிகள் அடுத்தகட்ட செயல்பாடுகளுக்கு ஒப்புதல் அளிப்பர் என்று தெரிவித்தனர்.
இந்த புதிய வசதி பொதுமக்களுக்கு பெரிதும் பயனுள்ளதாக இருக்கும் என்று எதிர்பார்க்கப்படுகிறது.