நடிகர் அஜித் நடித்து இந்த ஆண்டு வெளியான விஸ்வாசம் திரைப்படத்தின் கண்ணான கண்ணே பாடல் அதிகமான பார்வையாளர்களை பெற்று சாதனை படைத்துள்ளது. நடிகர் அஜித்- இயக்குனர் சிறுத்தை சிவா கூட்டணியில் நான்காவது படமாக உருவானது “விஸ்வாசம்”. இந்த படத்தில் அஜித்துக்கு ஜோடியாக நயன்தாரா நடித்து இருந்தார். இமான் இசையமைத்திருந்த இப்படம் 2019ஆம் ஆண்டு பொங்கலுக்கு நடிகர் ரஜினி நடித்த பேட்டை படத்துடன் களமிறங்கியது. வசூலில் சாதனை படைத்த விஸ்வாசம் தற்போது பாடல் மூலமாகவும் புதிய சாதனையை படைத்துள்ளது.
அந்த படத்தில் இடம்பெற்ற “கண்ணான கண்ணே” பாடல் யூடியூப் இல் நூறு மில்லியன் பார்வையாளர்களைக் கடந்துள்ளது. பாடலாசிரியர் தாமரை எழுதிய இப்பாடலை பாடகர் சித்ஸ்ரீராம் பாடியிருந்தார். தந்தை மகள் உறவை மையமாக வைத்து உருவான இப்பாடல் ரசிகர்களிடம் பெரும் வரவேற்பைப் பெற்றது.இந்த ஆண்டின் சிறந்த பாடல்களில் ஒன்றாக திகழும் கண்ணான கண்ணே பாடல் நூறு மில்லியன் பார்வையாளர்களைக் கடந்ததை கொண்டாடும் வகையில் ட்விட்டரில் #100loveforkannanakanne என்ற ஹாஸ்டேக்கை அஜித் ரசிகர்கள் ட்ரெண்ட் செய்தனர்.