கீவ்:-
தொலைக்காட்சி நேரடி ஒளிபரப்பில் செய்தி வாசிப்பாளர் தனது பல் விழுந்த நிலையில் அவர் நடந்து கொண்ட செயல் சமூக வலைதளங்களில் வைரலாகி வருகிறது.
உக்ரேனிய தொலைக்காட்சி ஒன்றில் செய்தி தொகுப்பாளராக பணியாற்றி வருபவர் மரிச்சா படல்கோ (Marichka Padalko). இவர், தொலைக்காட்சி செய்தியை நேரடியாக வாசித்துக் கொண்டிருந்தார். அப்போது எதிர்பாராதவிதமாக இவரது பல் உடைந்து விழுந்துள்ளது.
இது போன்ற நேரத்தில் பெரும்பாலானவர்கள் அதிர்ச்சியடைவார்கள் அல்லது சிரிப்பார்கள் அல்லது முகத்தில் ஒருவித அச்சம் இருந்திருக்கும். ஆனால், இந்த செய்தி வாசிப்பாளர் துளியும் பதற்றம் அடையாமல் கிழே விழுந்த பல்லை புத்திசாலிதனமாக கைகளால் பிடித்ததுடன், தான் தொகுத்து வழங்கிய நிகழ்ச்சியை தொடர்ந்தார்.
மரிச்சா படல்கோ கடந்த 20 ஆண்டுகளுக்கும் மேலாக செய்தி வாசிப்பாளராக இருந்து வருகிறார். பத்து வருடங்களுக்கு முன்னர் இவரது மகள் அலாரம் கடிகாரம் கொண்டு தாக்கியதால் இவரது பல் உடைந்தது என்பது குறிப்பிடத்தக்கது.
அந்த நேரத்தில் அவர், எந்தவொரு நிகழ்வும் நடக்காதது போல் நடந்து கொண்ட செயல் சமூக வலைதளங்களில் வைரலாகி வருகிறது.