சென்னை :-
ரஷியாவின் தயாரிப்பான ஸ்புட்னிக் வி கொரோனா தடுப்பூசி ஹைதராபாத்திலிருந்து தனியார் விமானம் மூலம் நேற்றிரவு சென்னை வந்தடைந்தது.
இந்த தடுப்பூசிகள் அனைத்தும் போக்குவரத்து ஏஜென்சியிடம் ஒப்படைக்கப்பட்டு, வாகனம் மூலம் பெரியபனிச்சேரியிலுள்ள தனியார் ஆய்வகத்துக்குக் கொண்டு செல்லப்பட்டன. பின்னர், அங்கிருந்து ஒரு பெட்டி தடுப்பூசிகள் கோவைக்கு அனுப்பி வைக்கப்பட்டன.
முன்னதாக, அவசரகால பயன்பாட்டுக்கு கோவிஷீல்ட் மற்றும் கோவேக்சினைத் தொடர்ந்து, ரஷ்யாவின் ஸ்புட்னிக் வி தடுப்பூசிக்கும் இந்தியாவில் அனுமதி வழங்கியது. ஜூன் மாத மத்தியிலிருந்து ஸ்புட்னிக் வி தடுப்பூசி செலுத்தும் பணியும் தொடங்கப்படும் என எதிர்பார்க்கப்படுகிறது.
ஸ்புட்னிக் V தடுப்பூசி கொரோனாவுக்கு எதிராக 91.6% செயல்திறன் கொண்டது என கூறப்படுகிறது. மேலும், இந்தியாவில் பயன்பாட்டுக்கு வந்திருக்கும் தடுப்பூசிகளிலேயே இதுதான் அதிக செயல்திறன் கொண்டது என்பது குறிப்பிடத்தக்கது.