தமிழ் சினிமாவின் பிரபல நகைச்சுவை நடிகர் விவேக் திடீர் நெஞ்சுவலி காரணமாக நேற்று சென்னையில் உள்ள தனியார் மருத்துவமனையில் அனுமதிக்கப்பட்டு, சிகிச்சை பெற்று வந்தார். இந்நிலையில் நடிகர் விவேக் இன்று காலை 4.35 மணியாளவில் சிகிச்சை பலனின்றி உயிரிழந்தார். பின்னர் இவரின் உடலுக்கு திரைப் பிரபலங்கள் முதல் ரசிகர்கள் வரை பலரும் நேரில் சென்று அஞ்சலி செலுத்தினர்.
மறைந்த நடிகர் விவேக்கிற்கு காவல்துறை மரியாதையுடன் இறுதிச் சடங்கு செய்ய தேர்தல் ஆணையத்திடம் அனுமதி கேட்டு தமிழக அரசு கடிதம் எழுதியிருந்த நிலையில் தேர்தல் ஆணையம் அனுமதி வழங்கியுள்ளது. இதனையடுத்து சுமார் 4 மணியளவில் நடிகர் விவேக்கின் இறுதி ஊர்வலம் சென்னை விருகம்பாக்கம் வீட்டில் இருந்து தொடங்கியது. பின் மேட்டுக்குப்பம் மின் மயானத்தில் காவல்துறை மரியாதையுடன் 72 துப்பாக்கி குண்டுகள் முழங்க நடிகர் விவேக்கின் உடல் தகனம் செய்யப்பட்டது.