அம்மா உணவகங்களை மூடும் எண்ணம் தனக்கு ஒருபோதும் கிடையாது என முதல்வர் மு.க.ஸ்டாலின் பேரவையில் அறிவித்துள்ளார்.
அம்மா மினி கிளினிக்குகளை தொடந்து அம்மா உணவகங்களை மூடும் முயற்சியில் தமிழ்நாடு அரசு ஈடுபட்டு வருவதாக எதிர்க்கட்சி தலைவர் எடப்பாடி பழனிசாமி குற்றச்சாட்டினார். இதற்கு பேரவையில் விளக்கம் அளித்த முதலமைச்சர் மு.க.ஸ்டாலின், அம்மா மினி கிளினிக் என பெயர் மட்டும் தான் இருக்கிறது, ஆனால் கிளினிக் இல்லை இல்லாத ஒன்றை எப்படி இந்த அரசால் மூடமுடியும் என பதிலடி கொடுத்தார்.
தொடந்து பேசிய அவர், அவை முன்னவரான துரைமுருகன் கூட கலைஞர் பெயரிலான திட்டங்கள் மாற்றப்பட்ட ஆதங்கத்தில் ஒரு உணவகத்தை மூடினால் என்ன தவறு என கேள்வி எழுப்பினார். ஆனால் நான் ஒருபோதும் அவ்வாறு நினைக்கவில்லை. எந்த அம்மா உணவகமும் மூடக்கூடாது என்பது தான் எனது எண்ணம். அதனால் தான் திமுக ஆட்சி பொறுப்பேற்றதும் அம்மா உணவகங்கள் தொடர்ந்து செயல்படும் என அறிவித்தேன். அதில் எவ்வித மாற்றமும் கிடையாது என்பதை எதிர்க்கட்சித் தலைவருக்கு உறுதியாக தெரிவித்துக்கொள்கிறேன் எனத் தெரிவித்தார்.