பாகிஸ்தான் நாட்டில் நடைபெறும் டெஸ்ட் போட்டிகளில் இனி விளையாட போவதில்லை என வங்கதேச கிரிக்கெட் வாரியம் திடீரென அறிவித்துள்ளது.
பாகிஸ்தானில் கடந்த 2009ஆம் ஆண்டு இலங்கை அணி வீரர்கள் மீது நடத்தப்பட்ட தீவிரவாத தாக்குதலுக்கு பிறகு அங்கு செல்ல எந்த அணியும் விரும்புவதில்லை. இதனால் பாகிஸ்தான் அணி வெளிநாடுகளிலும், பொதுவான வெளியிடங்களிலும் மற்ற நாடுகளுடன் போட்டிகளில் பங்கேற்று வந்தது. இதற்கிடையில் பத்தாண்டுகள் கழித்து இலங்கை அணி சமீபத்தில் பாகிஸ்தான் சென்று விளையாடியது. இதனால் மீண்டும் பாகிஸ்தானில் சர்வதேச போட்டிகள் நடைபெறும் என எதிர்பார்க்கப்பட்ட நிலையில் பாகிஸ்தானில் நடைபெறும் டெஸ்ட் போட்டியில் விளையாட மாட்டோம் என வங்கதேச கிரிக்கெட் வாரியம் அறிவித்துள்ளது.
இதுகுறித்து அறிக்கை வெளியிட்டுள்ள வங்கதேச கிரிக்கெட் வாரியத்தின் தலைமை செயல் அதிகாரி நிஜாமுதீன் சவுத்ரி, பாதுகாப்பு காரணங்களுக்காகவே பாகிஸ்தான் நடைபெறும் டெஸ்ட் போட்டியில் பங்கேற்க போவதில்லை என முடிவு செய்துள்ளோம். அதேசமயம் டி20 போட்டிகளில் விளையாட விரும்புவதாகவும் தெரிவித்துள்ளார்.வேண்டுமென்றால் டெஸ்ட் போட்டியில் வேறு ஏதாவது நாடுகளில் நடத்தினால் வங்கதேசம் அணி பங்கேற்கும் எனவும் அவர் அதில் குறிப்பிட்டுள்ளார்.