காணாமல் போன வளர்ப்பு பிராணிகளை கண்டுபிடிக்கும் சீனாவின் ‘பெட் டிடெக்டிவ்’
நம்மூரில் எல்லாம் நாம் ஆசையாக வளர்க்கும் செல்லப்பிராணிகள் தொலைந்துவிட்டால் போஸ்டர் அடித்து சன்மானம் வழங்குவதாக தெரிவிப்பார்கள். இதனை நாம் பல இடங்களில் பார்த்திருப்போம். ஆனால் சீனாவில் காணாமல் போன செல்லப்பிராணிகளை ‘பெட் டிடெக்டிவ்’ என்றழைக்கப்படும் மனிதர்கள் கண்டுபிடித்து கொடுக்கிறார்கள்.
அதில் ஒருவர் தான் சீனாவைச் சேர்ந்த சன் ஜின்ராங் என்னும் பெட் டிடெக்டிவ் . இவர்தான் சீனாவின் முதல் பெட் டிடெக்டிவ் என கவுரவிக்கப்பட்டுள்ளார். இதுவரையில் சுமார் 1000க்கும் மேற்பட்ட வளர்ப்புப் பிராணிகள் உரியவர்களிடம் கண்டறிந்து வழங்கியுள்ளாராம்.
கிட்டதட்ட 7 ஆண்டுகளுக்கும் மேலாக இப்பணியைச் செய்து வரும் சன் ஜின்ராங், ஒரு தேடுதல் பணிக்கு இந்திய மதிப்பில் சுமார் 80 ஆயிரம் ரூபாய் வரை பெறுகிறார்.
இதற்காகவே பல அதிநவீன தொழில்நுட்பக் கருவிகளை அவர் பயன்படுத்துகிறார். இவர் இதுவரையில் வழங்கப்பட்ட பணிகளில் சுமார் 70 %தொலைந்துபோன அல்லது திருடப்பட்ட செல்லப் பிராணிகளைக் கண்டறிந்து கொடுத்துள்ளார்.