சென்னை:
சென்னையில் பொது இடங்களில் குப்பை கழிவுவுகளை கொட்டுவதால் சுகாதார சீர்கேடுகளும், கட்டுமான கழிவுகளால் மழைக்காலங்களில் பொதுமக்களுக்கும், போக்குவரத்துக்கும் இடையூறு ஏற்படுகிறது.
சுகாதார சீர்கேடுகளை தடுக்கும் வகையில் சென்னை மாநகராட்சி நிர்வாகம் பல்வேறு நடவடிக்கை எடுத்து வருகிறது. எனவே பொது மற்றும் தனியார் இடங்களில் குப்பை கழிவுகளை வீசுபவர்கள் மீதும் மாநகராட்சி திடக்கழிவு மேலாண்மை துணை விதிகள் 2019ன் படி அபராதம் விதிக்க அதிகாரிகள் முடிவு செய்துள்ளனர்.
பொது மற்றும் தனியார் இடங்களில் குப்பையை வீசுபவர்கள், வாகனங்களில் இருந்து குப்பையை கொட்டுபவர்களுக்கு ரூ.500 அபராதமும், தரம் பிரிக்கப்படாத குப்பையை கொட்டுபவர்கள், தனிநபர் இல்லங்களுக்கு ரூ.100 அபராதமும், அடுக்குமாடி குடியிருப்புகளுக்கு ரூ.1,000 அபராதமும், பெருமளவு குப்பை உருவாக்குபவர்களுக்கு ரூ.5,000 அபராதமும் விதிக்க சென்னை மாநகராட்சி நிர்வாகம் முடிவு செய்துள்ளது.
அதுபோன்று பொது இங்களில் கட்டிட இடிபாடுகளை கொட்டுபவர்களுக்கு 1 டன் வரை ரூ.2,000 அபராதமும், 1 டன்னிற்கு மேல் ரூ.5,000 அபராதமும், தோட்ட கழிவுகள், மரக்கழிவுகளை பொது இடங்களில் கொட்டுபவர்களுக்கு ரூ.200 அபராதமும், கழிவுநீர் பாதை, கால்வாய், நீர்நிலைகளில் குப்பை கொட்டுபவர்களுக்கு ரூ.500 அபராதமும், திடக்கழிவுகளை எரிப்பவர்கள், தனியார் இடங்களுக்கு ரூ.500 அபராதமும், பொது இடங்களுக்கு ரூ.1,000 அபராதமும் வசூலிக்கப்படும், என சென்னை மாநகராட்சி தெரிவித்துள்ளது.
